એશિયા કપમાં ભારતની PAK પર સર્જિકલ સ્ટ્રાઈક:7 વિકેટથી હરાવ્યું, કેપ્ટન સૂર્યાના 47 રન; મેચ બાદ પાકિસ્તાની ટીમ રાહ જોતી રહી ને ઈન્ડિયન ટીમ હાથ મિલાવ્યા વગર જતી રહી

એશિયા કપમાં ભારતની PAK પર સર્જિકલ સ્ટ્રાઈક:7 વિકેટથી હરાવ્યું, કેપ્ટન સૂર્યાના 47 રન; મેચ બાદ પાકિસ્તાની ટીમ રાહ જોતી રહી ને ઈન્ડિયન ટીમ હાથ મિલાવ્યા વગર જતી રહી

એશિયા કપની છઠ્ઠી મેચમાં ભારતે પાકિસ્તાનને 7 વિકેટથી હરાવ્યું. ટીમે 16મી ઓવરમાં 3 વિકેટ ગુમાવીને 128 રનનો ટાર્ગેટ ચેઝ કર્યો. દુબઈ ઈન્ટરનેશનલ સ્ટેડિયમમાં પાકિસ્તાને ટૉસ જીતીને બેટિંગ કરવાનું પસંદ કર્યું અને 9 વિકેટ ગુમાવીને 127 રન બનાવ્યા.

મેચ જીત્યા પછી ભારતીય ખેલાડીઓએ પાકિસ્તાની ખેલાડીઓ સાથે હાથ ન મિલાવ્યા. અગાઉ, ટોસ પછી પણ કેપ્ટન સૂર્યકુમાર યાદવે પાકિસ્તાનના કેપ્ટન સલમાન અલી આગા સાથે હાથ મિલાવ્યા ન હતા.

ગ્રુપ-Aની આ મેચમાં ભારતીય બોલરોએ પાવરપ્લેથી જ દબાણ બનાવ્યું અને પાકિસ્તાની બેટર્સને અંત સુધી ઉપર આવવાનો મોકો ન આપ્યો. સાહિબઝાદા ફરહાન (40 રન) અને શાહીન આફ્રિદી (33 રન) સિવાય કોઈ પણ બેટર સારું પ્રદર્શન કરી શક્યો નહીં. કુલદીપ યાદવે 3 વિકેટ લીધી. જસપ્રીત બુમરાહ અને અક્ષર પટેલે 2-2 વિકેટ લીધી. હાર્દિક પંડ્યા અને વરુણ ચક્રવર્તીને એક-એક વિકેટ મળી.

ભારતીય ટીમ માટે ઓપનર અભિષેક શર્મા અને તિલક વર્માએ 31-31 રનની ઇનિંગ્સ રમી. જ્યારે કેપ્ટન સૂર્યકુમાર યાદવે અણનમ 47 રન બનાવ્યા. સૂર્ય-તિલકે ત્રીજી વિકેટ માટે 56 રનની મહત્વપૂર્ણ ભાગીદારી કરી. પાકિસ્તાન તરફથી સૈમ અયુબે ત્રણેય વિકેટ લીધી.

મેચના પૂરી થયા પછી ભારતીય ક્રિકેટ ટીમના કેપ્ટન સૂર્યકુમાર યાદવે આ જીત ભારતીય સેનાને સમર્પિત કરી. તેણે એમ પણ કહ્યું કે અમે પહેલગામના પીડિત પરિવારો સાથે ઉભા છીએ. અમે અમારી એકતા વ્યક્ત કરીએ છીએ, આ જીત આપણા તમામ સશસ્ત્ર દળોને સમર્પિત કરવા માંગીએ છીએ. આશા છે કે તેઓ આપણને પ્રેરણા આપતા રહેશે.

આ જીત સાથે, ભારત પોઈન્ટ ટેબલમાં ટોચ પર રહ્યું છે અને ટીમની સુપર-4માં પહોંચવાની શક્યતાઓ પણ વધી ગઈ છે. બીજી તરફ, જો પાકિસ્તાન આગામી રાઉન્ડમાં પ્રવેશવા માગે છે, તો તેણે UAE સામેની છેલ્લી મેચ જીતવી પડશે.

સૂર્યાએ પાકિસ્તાની કેપ્ટન સાથે હાથ નહીં મિલાવ્યા ટૉસ પછી, ભારતીય કેપ્ટન સૂર્યકુમાર યાદવ અને પાકિસ્તાની કેપ્ટન સલમાન અલી આગાએ હાથ મિલાવ્યા ન હતા. આંતરરાષ્ટ્રીય મેચમાં, ટૉસ પછી બંને કેપ્ટનો હાથ મિલાવે છે તે પરંપરા છે.

બન્ને ટીમની પ્લેઇંગ-11

ભારત (IND): સૂર્યકુમાર યાદવ (કેપ્ટન), અભિષેક શર્મા, શુભમન ગિલ, સંજુ સેમસન (વિકેટકીપર), તિલક વર્મા, શિવમ દુબે, હાર્દિક પંડ્યા, અક્ષર પટેલ, કુલદીપ યાદવ, જસપ્રીત બુમરાહ અને વરુણ ચક્રવર્તી.

પાકિસ્તાન (PAK): સલમાન આગા (કેપ્ટન), સૈમ અયુબ, સાહિબજાદા ફરહાન, મોહમ્મદ હારિસ (વિકેટકીપર), ફખર ઝમાન, હસન નવાઝ, મોહમ્મદ નવાઝ, ફહીમ અશરફ, શાહીન આફ્રિદી, અબરાર અહેમદ અને સુફિયાન મુકીમ.